Foto: arhiva,ilustracija

Odlazak u inostranstvo je vrijedno iskustvo koje nam obogaćuje život. Dok posjećujemo različite lokacije širom svijeta i razgovaramo sa ljudima iz ovih mjesta, mi na najbolji način upoznajemo različite kulture i stičemo utisak kako je živjeti u nekoj drugoj državi.

Važno je, međutim, upoznati se sa pojedinim pravilima ponašanja u stranim zemljama i prije nego što ih posjetimo, kako bismo se bolje snašli u njima, ali i da ne bismo nenamjerno ispali neučtivi prema lokalcima. U narednim redovima ćemo vam otkriti neka od ovih nepisanih pravila koja važe u različitim zemljama svijeta:

Kubanci rijetko prave redove, što čudi mnoge turiste. Naš savjet je da ako se nađete u situaciji da morate da čekate ispred nekog lokala ili službe u ovoj zemlji, kažete „el ultimo?“ i to pitanje će vam otkriti ko je posljednja osoba koja čeka prije vas.

U skandinavskim zemljama ljudi ne vole da pričaju o religiji. Oni na vjeru gledaju kao na nešto lično i ne žele da im neko nameće svoju religiju, niti oni imaju želju da svoju vjeru propovijedaju drugima.

Stanovnici Engleske, a posebno Londona, ne gledaju sa odobravanjem na osobe koje razgovaraju između sebe ili mobilnim telefonom u vozilima gradskog prevoza.

Nemojte se začuditi ako vas u Južnoj Koreji ljudi stalno budu pitali koliko imate godina. Naime, njima je potrebna ta informacija da bi znali kako da vam se obraćaju.

Koristite blagi naklon za pozdravljanje u Japanu, ali i kada hoćete nekom da se zahvalite na pomoći ili dobroj usluzi.

Kada u restoranima brze hrane u Singapuru vidite papirne maramice ili neki drugi manji predmet na stolu, to znači da ga je neko već rezervisao za sebe i otišao da naruči i pokupi obrok.

Irce posebno iritira ako napomenete da ste i vi porijeklom iz ove zemlje. Tu grešku najčešće prave američki turisti, budući da su stanovnici Irske masovno emigrirali u SAD tokom 19. i počektom 20. vijeka.

U Australiji nije preporučljivo da dodirujete bilo koju životinju s kojom niste imali iskustva do tada. Mnoge od njih su veoma agresivne i mogu vas ozbiljno ozlijediti ili otrovati.

Brazilci pričaju relativno glasno i oni će i vas ohrabriti da budete glasniji, kako bi vas što bolje razumjeli.

Izvor: Cdm